IXENTEFFUTEN DDERNIN !

Tajmilt i Yigellin n Muḥend Sɛidi Ameẓyan. Immut tam n iseggwasen a-ya.

Is tgezzul neɣ tezwa tmektit n Yimaziɣen ? Is tennegza ? Is temmuḍen midd ɣas asselku ayed deg-sen izedɣen amm twekka, yagi ad ten-ifel ? Da ttettun zik winna ɣif-sen innaɣen, winna ifkan seg wakud d yidrimen-nnsen af ad ssegmen, ssemɣuren, syissnen idles-nnsen.Stiɣ asselku acku winna ittnaɣen ɣef « ugdud »-ddeɣ, mzin kigan n yidasilen, da ttusselkan. Ig annayen kra n yiwen ifka udem i uzwu n tkendawt da ttirin ad t-settuttin, ad as-bbin iḍarren, qqnen-as imi, bbin-as iḍudan. Da ttettan aksum-nnes s tqucin-nnsen imesden, feẓẓin uddur-nnes, ɣwmen s uledduy isem-nnes, sexnunnsen anzaren-nnes g yiɣed d wakal unɣid isal idder. Mek iɣley, zemren ad sskemḍen iɣsan-nnes g walmessi n tmektit-nnsen af ad mlen i yicenga-nnsen is ɣif-s ssarden ifassen. Af ad ɣur-s ilin azal. Nurzen ad ifest af ad ten-irwas. Ad ig amm nitni. Ad ikjem ammas n tewrut, isseknu iɣef amm tili, ifel ameksa ad t-yawi ɣer adɣar g ittuɣras. Ran ad ig afukal amm nitni. Sselkan winna ɣif-sen ittnaɣen imkinna sselkan iman-nnsen d yidles-nnsen. Sselkan-ten acku ggwden. Ggwden ad duyen mek annayen udmawen-nnsen g tisit n tidet. Rẓan akw tisitin g yiɣerman. Rẓan awed imawen n yimedyazen asen-d-issektayen mayed msen. Imaɣ allig da sawaleɣ ɣef yixenteffuten-ddeɣ iddren iɣalen is gan « Imaziɣen », iregzen d twetmin ilella, ilan uddur imeqquren d umezruy iɣwban? Acku sefḍen timitar n wudmawen-nnsen, udren i wuddur-nnsen, sɣusen amezruy-nnsen. Ur zmiren ad t-asin g twengimin d wulawen-nnsen. Isettul amm wuzzal. Nitni, sdident tḍarin-nnsen amm tɣanimin, ur zmirent ad asint aggwa n yimawen-nnsen meqqurnin. Rwasen win yiɣucafen. Ssatin udem. Fkan tadawt i usidd n tafuyt. Lsan timelsa yaḍnin, sɣan tiktiwin yaḍnin, ar ttnaɣen ku ass ad nin aman n marur asen-d-ikkan aneqqer. Ddan, ttun, accken, ur yad zmiren ad uɣulen ɣer adɣar g gman. Amm yigḍaḍ ittun timizar g zrin tisitin izemren ad asen-d-ssektint timitar n wudmawen-nnsen. Meqqaṛ yuccka umata, llan yixenteffuten d-ssnekrent titiwat asen-akkan yimedyazen, imzilen n wawal, s yifḍisen-nnsen dusnin ɣef uzellif. Mɣin-d seg umedlu asen-iqqnen allen timiḍa d tmiḍa n yiseggwasen. Ar d-ssenkaren wiyeḍ. Imeggura-ddeɣ sulen nurzen ad diɣ ɣwebbzen g yiṭes acku yaṭfut-asen. Tiwirga-nnsen settunt-asen tilawt. Irinen asen-itteddun g yiẓuran ssgerden inelliten-nnsen. Iddeɣ ssnekren yixenteffuten iddren aqqur, bedden-d ayetmatsen mgal-nnsen. Kud sɣuyyun yimedyazen « Nra ad nili », ttraran-asen « Nra ad ngen ! Nenurez ad nseɣ tiwirga yaḍen ! Tilawt ur as-nezmir !»Udren i yixenteffuten ddernin ssa n tidda ddaw wakal. Iqqim-d unaruz n tnekra isul izdeɣ Adrar n Dren yallan ɣef tarwa-nnes. Imaɣ da inedder udrar ? ayed asen-inna yiwen. Nnan-as : « Ilaq awed netta ad ifest ! » Nekren ẓar-s ran ad t-ɣzen, ad t-settuttin acku andar-nnes ur da ten-ittaǧǧa ad gnen g tmeḍlin-nnsen rɣanin. Muḥend-nneɣ ! Tirac n uledduy, isefsi-tent uzɣal n tafuyt Tesɣer-tent tilawtSlatfen s igenna, yuɣul-asen-d s iɣwenba.Abrid-nnek nsul dig-sIdurar sulen ddren Da akw neddren ! Tanemmirt a Muḥend-nneɣ aneɣ-isslemden ad nettwarag !Ur k-nettu. Ur sar !

Aksil Azergi

Votre commentaire

Entrez vos coordonnées ci-dessous ou cliquez sur une icône pour vous connecter:

Logo WordPress.com

Vous commentez à l’aide de votre compte WordPress.com. Déconnexion /  Changer )

Photo Google

Vous commentez à l’aide de votre compte Google. Déconnexion /  Changer )

Image Twitter

Vous commentez à l’aide de votre compte Twitter. Déconnexion /  Changer )

Photo Facebook

Vous commentez à l’aide de votre compte Facebook. Déconnexion /  Changer )

Connexion à %s